“Ekspress” qəzeti yazır ki, rəqəmlər vasitəsi ilə biz həyatı dərk edirik. Saatı, günü, ayı, zamanı, çəkini, uzunluğu özündə birləşdirən rəqəmlər həyatımızda müstəsna rol oynayır. Dahi yunan filosofu Pifaqor dünyanın rəqəmlər üzərində qurulduğunu bildirir.
Elə rəqəmlər var ki, xüsusi əhəmiyyətə malikdir. 666, 13, 7, 11, 9 və s. bu kimi rəqəmlərin özünəməxsus sirləri var. Çoxumuz rəqəmlərin sirrinə inanır və bu inanclardan həyatımızda da istifadə edirik. Məsələn, insanlar maşın, ev, telefon nömrələrini eyni seçərək, bunu sınayırlar. Və yaxud, hər hansı bir rəqəmi özümüz üçün seçir və bunun uğur gətirəcəyinə inanırıq. Kornemusun “Mistik fəlsəfə” əsərinə görə, 1-məqsəd rəqəmi, 2-ziddiyyətli rəqəm, 3-dəyişkənlik bildirir, 4-davamlılıq və möhkəmlik bildirir. 5-risk, 6-etibarlılıq, 7-sirli rəqəmdir. 8-maddi cəhətdən uğurlu, 9- ümumi uğur rəmzidir.
11 sentyabr məlum hadisəsindən sonra dünyanın müxtəlif öncəgörənləri, medium və cadugərləri, ekstrasens və parapsixoloqları, hərbçi və tədqiqatçıları bu müəmmalı olayın izahını verməyə çalışıblar. Bir müddət öncə hind numeroloqları faciənin izahını özünəməxsus şəkildə veriblər.
Rəqəmlərin sehrindən danışan “Qoroskop” qəzetinin baş redaktoru, astroloq Səbuhi Rəhimlinin sözlərinə görə, 11 rəqəmi ilə bağlı olan Amerika faciəsinin baş verdiyi gündə rəqəmlərin sayının üst-üstə düşməsi, həqiqətən də adamı lərzəyə gətirir. Hind numeroloqları öz tədqiqatları haqqında məlumatları “Eyşn Eyc” qəzetində dərc ediblər, nəticədə isə faciəli 11 rəqəmi aşkara çıxıb. Bu rəqəmdə həqiqətən də bir çox gizli məqamlar kəsişib. Terror aktlarının törədildiyi gün – 11 sentyabr. Həmin gün ilin 254-cü günüdür, cəmi 11 (Numerologiya qaydalarına əsasən 254=2+5+4=11). “Əgər bu cür arifmetik hərəkəti ayın tarixində də etsək (9-cu ayın 11-i), onda cəm yenə də 11 olar: yəni, 9+11=9+2=11. Onu da qeyd edək ki, sentyabrın 11-dən ilin sonuna kimi 111 gün qalır.
Daha sonra hind maqları aviareyslərin nömrələrini öyrəniblər. Dünya ticarət mərkəzinin birinci binasıyla toqquşan təyyarə reysinin nömrəsi 11 idi. Həmin təyyarədə 92 sərnişin olub: 92=9+2=11. İkinci təyyarədə isə 65 nəfər olub: 65=6+5 – yenə 11 rəqəmi alınır”.
Bu qəribəliyi görən numeroloqlar tarixə müraciət ediblər. Nyu-York ştatı ABŞ-ın sayca 11-ci ştatıdır. Bir çox sözlərin yazılışını diqqətlə araşdırdıqdan sonra mütəxəssislər belə qərara gəliblər:
1. İngilis transkripsiyasında Nyu-York şəhəri 11 işarədən ibarətdir;
2. Ərazisi ABŞ tərəfindən raket zərbəsinə məruz qalmış Əfqanıstanın ingilis transkripsiyasında 11 işarə var;
3. Pentaqon sözünün orijinal yazılışında da 11 hərf var;
4. Əkiz binaların ümumi görünüşü Nyu-Yorkun səmasında 11 rəqəmini xatırladır.
S.Rəhimliyə görə, ümumiyyətlə, 11 bütün gizli elmlərdə “yaramaz” rəqəm sayılır. “Əgər 10 qanun rəqəmi sayılırsa, 11 qanundankənar, cinayətkar bir rəqəmdir. Kabbalada deyilir: “11 rəqəmi antaqonizm, qəzəb, şər qüvvələri təcəssüm etdirən iki sütundan ibarətdir”.
Çoxumuz 13 rəqəmini nəhs rəqəm kimi qəbul edirik. Ayın 13-ü olanda həyəcanlı olur, 13-cü olmaq istəmirik. Bəzi inanclara görə 13 ölüm rəqəmidir. Yer əhlinin böyük hissəsi inanır ki, ayın 13-ü və həftənin cümə günlərinin üst-üstə düşməsi fəlakət və uğursuzluq gətirir. Ayın 13-nün cüməyə təsadüf etməsi ta qədimdən mistik məna daşıyıb. Bu günün mistik cazibəsi insanlara indi də rahatlıq vermir. Alimlər isə bunu zarafat sayırlar. Astroloqun fikrincə, xurafatçı inanclara görə, ayın 13-ü cüməyə düşəndə qaniçənlər, əcinnələr və s. şeytani qüvvələr bir yerə yığışıb demonik toplantı, şabaş keçirirlər. Gecə yarısı olanda isə onlar dəhşətli əməllər törədirlər. Bu xurafata inamın güclü olmasına görə keçmişdə ayın 13-ü cüməyə düşəndə toy etməz, gəmilər limanlardan ayrılmaz, heç bir saziş bağlanmazmış. Hətta insanlar evdən bayıra çıxmamağa çalışarmış. “Bəzi versiyalara görə, 13-ü cümənin nəhs sayılması İsa Peyğəmbərlə (ə) bağlıdır. Onu məhz ayın 13-də, cümə günü çarmıxa çəkiblər. Üstəlik, peyğəmbəri satan mürid İuda gizli gecədə keçirilən toplantıda 13-cü iştirakçı olub”.
İngiltərədə binalarda 13 saylı mənzil, kinoteatrlarda 13 saylı kreslo olmur. Əgər bir qonaqlığa 13 adam gəlibsə, mütləq 14-cü kürsü də qoyur, ona maneken otuzdurur, qarşısına hətta yemək-içmək də qoyurlar. Almaniya, Avstriya və Skandinaviya ölkələrinə məxsus hava yolları şirkətlərəninin təyyarələrində 13 saylı kreslo olmur.
Bu gün insanların qorxduğu, çəkindiyi, bəzilərinin isə sevdiyi rəqəmlərdən biri də 666-dır. 666 şeytan rəqəmi kimi qəbul edilib. Üç 6-nın birləşməsi bəziləri üçün faciə deməkdir. 06.06.2006 tarixi bütün dünyanın gərginliklə qarşıladığı bir gün olüb. Belə ki, hətta hamilə qadınlar uşaqlarının bu tarixdə doğulmaması üçün əllərindən gələni etməyə çalışıblar. İnanclara görə, bu gün doğulan uşaq şeytan xislətli, uğursuz ola bilərmiş. Onu da deyək ki, bu inanca dünya şöhrətli siyasətçilər belə inanır. Elmdə də 666 rəqəmi əks olunub. Həyatın qaynağı sayılan karbon atomlarının tərkibi belədir: 6 proton, 6 neytron, 6 elektron. Yəni, 6-6-6.
İnsanları daim düşündürən rəqəmlərdən biri də 9-dur. 9 mütləqiyyət rəmzidir. 10 isə mənasız rəqəm sayılır.
Rəqəmlərin sirri haqqında çox danışmaq olar. Bu barədə müxtəlif ölkələrin araşdırmaçıları müxtəlif rəylər irəli sürüblər. Bəzi ölkələrdə nəhs, düşərsiz sayılan rəqəmlər digər ölkələrdə müqəddəs sayılır. S.Rəhimlinin sözlərinə görə, insan cazibə qüvvəsinə malikdir və bu səbəbdən də insanın düşüncələri hər zaman müxtəlif formalarda özünə qayıdır.
